કેનાલમાંથી લાશ મળવાનો સિલસિલો યથાવત
થરાદ આસપાસની કેનાલથી વારંવાર મળી આવે છે લાશો
ભાભરના વજાપુર ગામ નજીકની રૂની માઈનોર કેનાલમાંથી આધેડની લાશ મળી આવતાં ચકચાર
કેનાલમાંથી લાશો મળી આવવાનો સિલસિલો અકબંધ રહેતા સમગ્ર પંથકમાં ચકચાર મચી જવા પામ્યો છે, જોકે કોઈ અગમ્ય કારણોસર કેનાલમાં ઝંપલાવી મોતને વહાલું કરવાની ઘટના રોજીંદી બની જતાં કેનાલો હવે કાળનો કોળિયો બની ગઈ હોય તેવું લાગી રહ્યું છે, ત્યારે ભાભર તાલુકાના વજાપુર ગામ નજીકથી પસાર થતી રૂની માઈનોર કેનાલમાં ગતરોજ આધેડ ઈસમે ઝંપલાવ્યાનું સ્થાનિક તરવૈયાઓને જાણ કરતા સ્થાનિક તરવૈયાઓેએ શોધખોળ હાથ ધરી હતી પરંતુ શોધખોળ દરમિયાન આધેડ ઈસમની લાશ ન મળતાં આજરોજ થરાદ નગરપાલિકાના ફાયર બ્રિગેડની ટીમને જાણ કરાતાં ફાયર બ્રિગેડ વિભાગના તરવૈયા સુલતાન મીર, વિરમજી રાઠોડ, ધનજીભાઈ પ્રજાપતિ સહિત અન્ય ટીમ દ્વારા શોધખોળ હાથ ધરાતા રૂની માઈનોર કેનાલમાંથી આધેડ ઈસમની લાશ મળી આવી હતી. લાશની ઓળખ કરાતા મૃતક આધેડ ઈસમનું નામ આંબાભાઈ રગનાથભાઈ પટેલ ઉંમર વર્ષ આશરે ૫૦ વર્ષ હોવાનું જાણવા મળતા મૃતક આધેડ ઈસમની લાશ તેમના પરિવારજનોને સોંપાઈ હતી.
અહેવાલ : અરવિંદ પુરોહિત, થરાદ
